Ha’u iha tanba ó

Ha’u iha ne’e tanba ó

Maski dala ruma kondisaun moris hakanek ha’u

Ha’u fiar, ó mós sente saida mak ha’u sente

Ha’u iha ne’e nafatin iha esperansa

Espera ba domin ne’ebé karik ó dúvida

Ha’u nafatin iha esperansa boot ba ó tanba ó mak ha’u

Maski ó si’ak, ha’u la importa, tanba ha’u hatene

Tanba ó mak ha’u nia espíritu.

Bainhira ó hahoris ha’u no hahú sente moris ne’e

Ó haree ha’u ho oin-midar no hamnasa

Maski ha’u tanis, ó hamnasa no hakuak ha’u metin iha ó-nia fuan.

Ha’u iha tanba ó-nia fuan

Ha’u-nia isin ne’ebé ha’u iha, frazil tebes

No isin ne’e sei halo ó tanis no triste

Ó-nia tanis no tristeza sei halo ha’u konxiente

Katak ó hadomi liu ha’u ho domin ne’ebé la iha limitasaun.

Ajuda ha’u! ha’u iha tanba ó!

Ha’u-nia domin ba ó loos duni sidauk kompletu tanba ha’u ema ne’ebé iha isin

Maibé ha’u-nia fuan nafatin fiel ba ó

Ha’u-nia fuan nafatin saudade ba ó maski ha’u rasik la konxiente.

Dala ruma ó rejeita saida mak ha’u ko’alia no halo

Maibé fuan ne’e nafatin hamnasa midar ba ó

Tanba ó hatene no koñese di’ak liu ha’u

Ha’u fiar ó hadomi liu ha’u

La importa sé mak ha’u no saida mak ha’u halo.

Ha’u konxiente ha’u mós ema,

Perdua ha’u

Kuandu ha’u iha tebes esperansa ba ó

Perdua ha’u mós tanba dala barak ha’u monu

Kuandu ha’u husu hela de’it ó

Ha’u mai book ka distúrbiu ó

Ha’u só hakarak haree no sente ó nia hamnasa midar

No iha esperansa atu ó sai ha’u nian no ha’u an lo-loos

Ema ne’ebé dala ruma ó dúvida ne’e.

Ha’u saudade liu ó ha’u-nia klamar

Ajuda ha’u!

Hosi: Crisogno, S. F. Pereira (14 June 2017) Reflesaun no orasaun